സ്ത്രീവിരുദ്ധ പരാമര്‍ശം; നടന്‍ മന്‍സൂര്‍ അലി ഖാനെതിരെ കേസെടുത്ത് വനിത കമീഷന്‍
ന്യൂഡല്‍ഹി: സ്ത്രീവിരുദ്ധ പരാമര്‍ശം നടത്തിയെന്ന ആരോപണത്തില്‍ നടന്‍ മന്‍സൂര്‍ അലി ഖാനെതിരെ സ്വമേധയ കേസെടുത്ത് ദേശീയ വനിതാ കമീഷന്‍.
പരാമര്‍ശത്തിന് പിന്നാലെ മന്‍സൂര്‍ അലി ഖാനെതിരെ രൂക്ഷ വിമര്‍ശനവുമായി നടി തൃഷ രംഗത്തെത്തിയിരുന്നു. മനുഷ്യരാശിക്ക് തന്നെ അപമാനമാണ് മന്‍സൂര്‍ എന്നും അയാള്‍ക്കൊപ്പം ഒരിക്കലും സ്‌ക്രീന്‍ സ്പേസ് പങ്കിടില്ലെന്നുമായിരുന്നു തൃഷയുടെ പരാമര്‍ശം. ലിയോയുടെ സംവിധായകന്‍ ലോകേഷ് കനകരാജും തൃഷക്ക് പിന്തുണയറിച്ച്‌ രംഗത്തെത്തിയിരുന്നു. സഹപ്രവര്‍ത്തകന്റെ സ്ത്രീ വിരുദ്ധ പരാമര്‍ശത്തില്‍ നിരാശനാണെന്നും രോഷം തോന്നിയെന്നും ലോകേഷ് പറഞ്ഞു.
മന്‍സൂര്‍ അലി ഖാനെതിരെ വിമര്‍ശനവുമായി നടിയും ബി.ജെ.പി നേതാവും വനിത കമീഷന്‍ അംഗവുമായ ഖുശ്ബു സുന്ദറും രംഗത്തെത്തിയിരുന്നു. ഖുശ്ബു സുന്ദര്‍, റോജ തുടങ്ങിയ നടിമാര്‍ക്കെതിരെയും മന്‍സൂര്‍ വിവാദ പരാമര്‍ശം നടത്തിയിരുന്നു.
പരാമര്‍ശം വിവാദമായതോടെ താന്‍ പറഞ്ഞത് തമാശയാണെന്നായിരുന്നു മന്‍സൂര്‍ അലി ഖാന്റെ പ്രതികരണം.
