ഉമ്മൻ ചാണ്ടിയുടെ കല്ലറയിൽ പുഷ്പാർച്ചന നടത്തി മുഖ്യമന്ത്രി വി.ഡി. സതീശൻ
കോട്ടയം: മുൻ മുഖ്യമന്ത്രി ഉമ്മൻ ചാണ്ടിയുടെ മൂന്നാം ചരമവാർഷികത്തോടനുബന്ധിച്ച് പുതുപ്പള്ളി പള്ളിയിലെ കല്ലറയിൽ പുഷ്പാർച്ചന നടത്തി മുഖ്യമന്ത്രി വി.ഡി. സതീശൻ. മുഖ്യമന്ത്രിയായ ശേഷമുള്ള തന്റെ ആദ്യ ഔദ്യോഗിക കോട്ടയം സന്ദർശനത്തിനിടയിലാണ് അദ്ദേഹം പുതുപ്പള്ളിയിലെത്തി പ്രാർത്ഥനകളിൽ പങ്കുചേർന്നത്. ഉമ്മൻ ചാണ്ടി ഇരുന്ന അതേ മുഖ്യമന്ത്രി കസേരയിൽ ഇരിക്കുമ്പോൾ അദ്ദേഹത്തെപ്പോലെ ജനകീയനാകാനാണ് താൻ ശ്രമിക്കുന്നതെന്ന് വി.ഡി. സതീശൻ പറഞ്ഞു.
തന്റെ ഔദ്യോഗിക ഫേസ്ബുക്ക് കുറിപ്പിലൂടെയാണ് ഉമ്മൻ ചാണ്ടിയെന്ന ജനനായകനെക്കുറിച്ചുള്ള ഓർമ്മകൾ മുഖ്യമന്ത്രി പങ്കുവെച്ചത്. ഏത് പ്രതിസന്ധി ഘട്ടത്തിലും ഉമ്മൻ ചാണ്ടി എന്നൊരാൾ ഫോണിന്റെ മറുതലയ്ക്കലോ ഒരു നിവേദനത്തിന് തൊട്ടരികിലോ ഉണ്ടെന്നത് ലോകത്താകമാനമുള്ള മലയാളികളുടെ സ്വകാര്യ അഹങ്കാരമായിരുന്നുവെന്ന് വി.ഡി. സതീശൻ ഓർമ്മിച്ചു.
ഉമ്മൻ ചാണ്ടിയാകുക എന്നത് മറ്റാർക്കും സാധ്യമായ ഒന്നല്ല. എന്നാൽ, സാധാരണക്കാരെ എങ്ങനെ ചേർത്തുപിടിക്കണമെന്ന് ഓരോ പൊതുപ്രവർത്തകനെയും പഠിപ്പിച്ചത് ഉമ്മൻ ചാണ്ടി സാറാണ്. ആ ചുമതലയാണ് നമ്മൾ നിർവ്വഹിക്കേണ്ടതെന്നും അദ്ദേഹം കുറിപ്പിൽ വ്യക്തമാക്കി.
