വളരെ ആലോചിച്ച് ഗ്രന്ഥങ്ങൾ പരിശോധിച്ചാണ് വിധി പറയുന്നത് ; മതനിയമങ്ങൾ ആർക്കുവേണ്ടിയും തിരുത്തിപ്പറയില്ല': കാന്തപുരം
മതനിയമങ്ങൾ ആർക്കുവേണ്ടിയും തിരുത്തിപ്പറയില്ലെന്ന് സുന്നി ജംഇയ്യത്തുൽ ഉലമ ജനറൽ സെക്രട്ടറി കാന്തപുരം എ.പി. അബൂബക്കർ മുസ്ലിയാർ. മതനിയമങ്ങൾ ആരുടെയെങ്കിലും ഇഷ്ടമോ തൃപ്തിയോ നോക്കിയല്ല പറയുന്നതെന്നും ഏതെങ്കിലും വ്യക്തിക്കോ പാർട്ടിക്കോ വേണ്ടി തിരുത്തിപ്പറയില്ലെന്നും കാന്തപുരം മലപ്പുറം തിരൂരങ്ങാടിയിൽ പറഞ്ഞു.
ഞങ്ങൾ വളരെയധികം ആലോചിച്ച് ഗ്രന്ഥങ്ങൾ പരിശോധിച്ചാണ് വിധി പറയുന്നത്. ഓരോ സന്ദർഭത്തിലും ആവശ്യമുള്ളത് എന്താണെന്ന് നോക്കിയാണ് പ്രവർത്തിക്കുന്നത്. അഹ്ലുസുന്നയുടെ കാര്യങ്ങൾ പറഞ്ഞുകൊണ്ടിരിക്കും. അത് മുടക്കിക്കളയാനോ തിരുത്തിപ്പറയാനോ ആർക്കും കഴിയില്ല.
സമസ്ത എന്ന സംഘടന ഉള്ളതുകൊണ്ടാണ് സുന്നി പ്രവർത്തകർ ബാക്കിയായത്. അതിന്റെ പ്രവർത്തനം അന്ത്യനാൾ വരെ തുടരുമെന്നും കാന്തപുരം പറഞ്ഞു.
