ഹോർമുസ് തുറക്കാമെന്ന ഇറാന്റെ നിർദേശം തള്ളി ട്രംപ്
ഹോർമുസ് കടലിടുക്ക് വീണ്ടും തുറക്കാമെന്ന ഇറാന്റെ നിർദേശം അമേരിക്കൻ പ്രസിഡന്റ് ഡൊണാൾഡ് ട്രംപ് തള്ളിയതായി സ്ഥിരീകരിച്ചു. ശനിയാഴ്ച വൈറ്റ് ഹൗസിൽ മാധ്യമങ്ങളോട് സംസാരിക്കവെയാണ് ട്രംപ് ഇക്കാര്യം വ്യക്തമാക്കിയത്.
ഇറാൻ മുന്നോട്ടുവച്ച നിർദേശം അംഗീകരിക്കാനാകാത്തതാണെന്നും, ഉടൻ കരാറിലെത്താൻ ടെഹ്റാൻ ശ്രമിക്കുന്നത് യുദ്ധത്തിൽ കനത്ത തിരിച്ചടി നേരിടുന്നതിനാലാണെന്നുമാണ് ട്രംപിന്റെ അവകാശവാദം.
ഇറാന്റെ നിർദേശപ്രകാരം ഏഴ് ദിവസത്തിനുള്ളിൽ ഹോർമുസ് കടലിടുക്ക് തുറക്കാനും അമേരിക്കയുമായി ആണവപരിപാടിയെക്കുറിച്ചുള്ള ചർച്ചകൾ പുനരാരംഭിക്കാനുമാണ് ലക്ഷ്യമിട്ടിരുന്നത്. ഇതിന് പകരമായി ഇറാൻ ആവശ്യപ്പെട്ടത് ഇറാനിയൻ തുറമുഖങ്ങളിലെ അമേരിക്കൻ നാവിക ഉപരോധം പിൻവലിക്കുക, ഇറാന്റെ എണ്ണവിൽപ്പനയ്ക്കുള്ള ഉപരോധ ഇളവുകൾ അനുവദിക്കുക, ലെബനനും ഉൾപ്പെടുന്ന വെടിനിർത്തൽ നടപ്പാക്കുക തുടങ്ങിയ കാര്യങ്ങളാണ്. നിർദേശം ഖത്തർ ഉൾപ്പെടെയുള്ള മധ്യസ്ഥർ വഴിയാണ് അമേരിക്കയ്ക്ക് കൈമാറിയതെന്ന് റിപ്പോർട്ടുകൾ പറയുന്നു.
“അവർ ഒരു നിർദേശം മുന്നോട്ടുവച്ചു, ഞാൻ അത് തള്ളി” എന്നാണ് ട്രംപ് മാധ്യമങ്ങളോട് പറഞ്ഞത്. ഹോർമുസ് ഉടൻ തുറക്കാമെന്ന കരാറാണ് ഇറാൻ മുന്നോട്ടുവച്ചതെന്നും, എന്നാൽ ആ കരാർ അംഗീകരിക്കാനാകില്ലെന്നും അദ്ദേഹം വ്യക്തമാക്കി. അതേസമയം, അമേരിക്കൻ ഉദ്യോഗസ്ഥർ മധ്യസ്ഥരുമായി ക്രിയാത്മകവും അനുകൂലവുമായ ചർച്ചകൾ നടത്തുന്നുണ്ടെന്ന് വൈറ്റ് ഹൗസ് നേരത്തെ അറിയിച്ചിരുന്നു.
