3 ഗ്യാസ് സിലിണ്ടർ, സൗജന്യ ബസ് യാത്ര; തമിഴ്നാട്ടിൽ വീണ്ടും വമ്പൻ പ്രഖ്യാപനങ്ങളുമായി വിജയ്
ചെന്നൈ: വമ്പൻ പ്രഖ്യാപനങ്ങളുമായി തമിഴ്നാട് മുഖ്യമന്ത്രി ജോസഫ് സി. വിജയ്. നിയമസഭയിൽ നടത്തിയ പ്രസംഗത്തിൽ മൂന്ന് സൗജന്യ എൽ.പി.ജി സിലിണ്ടറുകളും, സർക്കാർ ബസുകളിൽ സ്ത്രീകൾക്കുള്ള സൗജന്യ യാത്ര വിപുലീകരിക്കുന്ന പദ്ധതിയും പ്രഖ്യാപിച്ചു.
സൗജന്യ ഗ്യാസ് സിലിണ്ടറുകളെക്കുറിച്ച് വ്യക്തമാക്കവെ, പ്രതിവർഷം 2.5 ലക്ഷം രൂപയോ അതിൽ താഴെയോ വരുമാനമുള്ള കുടുംബങ്ങൾക്ക് വർഷത്തിൽ മൂന്ന് എൽ.പി.ജി സിലിണ്ടറുകൾ ലഭ്യമാക്കുന്ന 'അന്നപൂർണി സൂപ്പർ 6' പദ്ധതി നടപ്പിലാക്കുമെന്ന് വിജയ് അറിയിച്ചു. 2027 ജനുവരിയിലെ വരാനിരിക്കുന്ന പൊങ്കൽ പ്രമാണിച്ച് പദ്ധതി പ്രാബല്യത്തിൽ വരും.
സർക്കാർ നേരിട്ട് സിലിണ്ടറുകൾ വിതരണം ചെയ്യുന്ന രീതിയിൽ നിന്ന് വ്യത്യസ്തമാണ് ഈ പദ്ധതി. നിലവിലുള്ള വിതരണ ശൃംഖലയിലൂടെയായിരിക്കും ഗുണഭോക്താക്കൾ എൽപിജി സിലിണ്ടറുകൾ ബുക്ക് ചെയ്യുകയും കൈപ്പറ്റുകയും ചെയ്യുക. തുടർന്ന്, എണ്ണക്കമ്പനികളിൽ നിന്ന് സർക്കാർ വിവരങ്ങൾ ശേഖരിക്കും. തുടർന്ന് സിലിണ്ടറിൻ്റെ വില ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് സർക്കാർ തന്നെ നേരിട്ട് തിരികെ നൽകുന്ന രീതിയിലായിരിക്കും ക്രമീകരണം.
ഏകദേശം 4,000 കോടി രൂപ സംസ്ഥാനത്തിന് ചെലവ് പ്രതീക്ഷിക്കുന്ന ഈ പദ്ധതിയിലൂടെ, ഡയറക്ട് ബെനിഫിറ്റ് ട്രാൻസ്ഫർ വഴി 1.30 കോടിയിലധികം അർഹരായ കുടുംബങ്ങൾക്ക് പ്രയോജനം ലഭിക്കും. മഹാത്മാ ഗാന്ധിയുടെ ജന്മദിനമായ ഒക്ടോബർ 2 മുതൽ സ്ത്രീകൾക്കും ട്രാൻസ്ജെൻഡർ യാത്രികർക്കും സൗജന്യ ബസ് യാത്രാ സൗകര്യം ഗണ്യമായി വിപുലീകരിക്കുന്ന 'വെട്രി പയണം' പദ്ധതിയും വിജയ് പ്രഖ്യാപിച്ചു.
