ചീഫ് ജസ്റ്റിസിനെതിരായ പോസ്റ്റ്; കെപിസിസി ഭാരവാഹികൾക്ക് കോടതിയലക്ഷ്യ നോട്ടീസ് അയച്ച് സുപ്രീം കോടതി
സുപ്രീം കോടതി ചീഫ് ജസ്റ്റിസ് സൂര്യകാന്തിനെ ലക്ഷ്യമിട്ട് സാമൂഹിക മാധ്യമത്തിൽ പോസ്റ്റിട്ട സംഭവത്തിൽ കേരള പ്രദേശ് കോൺഗ്രസ് കമ്മിറ്റിയിലെ (കെപിസിസി) എല്ലാ ഭാരവാഹികൾക്കും കോടതിയലക്ഷ്യ നോട്ടീസ് അയച്ച് സുപ്രീം കോടതി. അഭിപ്രായ സ്വാതന്ത്ര്യം നീതിന്യായ വ്യവസ്ഥയെ ഭീഷണിപ്പെടുത്തുന്നതിനോ നീതിനിർവഹണത്തിൽ ഇടപെടുന്നതിനോ ഉപയോഗിക്കാനാവില്ലെന്ന് കോടതി വ്യക്തമാക്കി.
ജസ്റ്റിസുമാരായ അരവിന്ദ് കുമാർ, വിപുൽ എം. പഞ്ചോളി എന്നിവരടങ്ങിയ ബെഞ്ചാണ് നടപടി സ്വീകരിച്ചത്. ഭരണഘടനയാണ് പരമോന്നതമെന്നും ഒരു വ്യക്തിയോ രാഷ്ട്രീയ സംഘടനയോ ഭരണഘടനയ്ക്ക് മുകളിലല്ലെന്നും കോടതി വ്യക്തമാക്കി. കോടതി വിധികളെ വിമർശിക്കാൻ സ്വാതന്ത്ര്യമുണ്ടെങ്കിലും നീതിന്യായ വ്യവസ്ഥയുടെ അധികാരത്തെ ദുർബലപ്പെടുത്താനുള്ള ശ്രമങ്ങളെ ശക്തമായി നേരിടേണ്ടതുണ്ടെന്ന് വാർത്താ ഏജൻസിയായ പി.ടി.ഐ റിപ്പോർട്ട് ചെയ്തു.
നീതിനിർവഹണത്തിൽ ഇടപെടുന്നതിന് ഭീഷണിപ്പെടുത്താനുള്ള കവചമായി അഭിപ്രായ സ്വാതന്ത്ര്യത്തെ ഉപയോഗിക്കാനാവില്ലെന്ന് ജഡ്ജിമാർ പറഞ്ഞു. കോടതികളുടെ അധികാരം നിയമവാഴ്ചയിൽ അധിഷ്ഠിതമാണെന്നും അതിന് രാഷ്ട്രീയ പിന്തുണയുടെ ആവശ്യമില്ലെന്നും ബെഞ്ച് കൂട്ടിച്ചേർത്തു.
കേസിൽ ക്രിമിനൽ കോടതിയലക്ഷ്യമോ സിവിൽ കോടതിയലക്ഷ്യമോ ഉൾപ്പെടുന്നുണ്ടോയെന്ന് പരിശോധിക്കാൻ കോടതിയെ സഹായിക്കുന്നതിനായി ഒരു മുതിർന്ന അഭിഭാഷകനെ വിദഗ്ധനായി ബെഞ്ച് നിയമിച്ചു. അറ്റോർണി ജനറൽ ആർ. വെങ്കിട്ടരമണിയുടെ സഹായവും കോടതി തേടി.
ചീഫ് ജസ്റ്റിസ് സൂര്യകാന്തിനെ പരാമർശിച്ച് കോൺഗ്രസിന്റെ കേരള ഘടകത്തിന്റെ ഔദ്യോഗിക എക്സ് അക്കൗണ്ടിൽ ഒക്ടോബർ 12-ന് പ്രസിദ്ധീകരിച്ച പോസ്റ്റുമായി ബന്ധപ്പെട്ടാണ് നടപടികൾ. സാമൂഹിക മാധ്യമങ്ങളിൽ വ്യാപക വിമർശനം ഉയർന്നതിനെ തുടർന്ന് പോസ്റ്റ് പിന്നീട് നീക്കം ചെയ്തിരുന്നു. പോസ്റ്റ് പ്രസിദ്ധീകരിച്ചതിന് ഉത്തരവാദിയായ വ്യക്തിയെ നീക്കം ചെയ്തതായി കോൺഗ്രസ് പിന്നീട് വ്യക്തമാക്കിയിരുന്നു.
