സിഎംആർഎൽ മാസപ്പടി കേസ്; പിണറായി വിജയന്റെ വസതിയിലും സിഎംആർഎൽ ഓഫീസുകളിലും ഇഡി റെയ്ഡ്

സിഎംആർഎൽ എക്സാലോജിക് സാമ്പത്തിക ഇടപാട് കേസുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയന്റെ വസതികളിലും മറ്റ് പ്രധാന കേന്ദ്രങ്ങളിലും എൻഫോഴ്‌സ്‌മെന്റ് ഡയറക്ടറേറ്റ് (ഇഡി)  റെയ്ഡ് . തിരുവനന്തപുരത്തെ വാടക വസതിയിലും കണ്ണൂരിലെ വീട്ടിലും ഉൾപ്പെടെ സംസ്ഥാനത്തുടനീളം പന്ത്രണ്ടോളം ഇടങ്ങളിലാണ് ഇഡി ഉദ്യോഗസ്ഥർ ഒരേസമയം പരിശോധന നടത്തിയത്. സിഎംആർഎൽ കമ്പനിയുടെ ഓഫീസുകളിലും ഉന്നത ഉദ്യോഗസ്ഥരുടെ വീടുകളിലും ഇഡി റെയ്ഡ് തുടരുന്നുണ്ട്. ഈ കേസിലെ ഇഡി അന്വേഷണം തുടരാമെന്ന് ഹൈക്കോടതി വ്യക്തമാക്കിയതിന് തൊട്ടുപിന്നാലെയാണ് കേന്ദ്ര ഏജൻസിയുടെ ഈ അപ്രതീക്ഷിതവും ശക്തവുമായ നടപടി.

സേവനങ്ങൾ നൽകാതെ സിഎംആർഎല്ലിൽ നിന്ന് എക്സാലോജിക് കമ്പനി 1.72 കോടി രൂപ കൈപ്പറ്റി എന്ന ആരോപണമാണ് കേസിന് ആധാരം. ഇഡി അന്വേഷണത്തെ ചോദ്യം ചെയ്തുകൊണ്ട് സിഎംആർഎൽ നൽകിയ ഹർജികൾ ഹൈക്കോടതി തള്ളിയതോടെയാണ് അന്വേഷണ ഏജൻസിക്ക് നടപടികളുമായി മുന്നോട്ട് പോകാൻ വഴിയൊരുങ്ങിയത്. കേസുമായി ബന്ധപ്പെട്ട നിർണ്ണായകമായ ഡിജിറ്റൽ തെളിവുകളും സാമ്പത്തിക രേഖകളും പിടിച്ചെടുക്കുകയാണ് ഈ പരിശോധനകളുടെ പ്രധാന ലക്ഷ്യമെന്നാണ് സൂചന.

വരും ദിവസങ്ങളിൽ കേസ് അന്വേഷണം കൂടുതൽ ശക്തമാകുമെന്നും കൂടുതൽ ആളുകളിലേക്ക് നീളുമെന്നുമാണ് റിപ്പോർട്ടുകൾ നൽകുന്ന സൂചന.