പ്രധാനമന്ത്രിയുടെ വിദേശയാത്രകൾക്ക് ചെലവായത് 557 കോടി രൂപ
ന്യൂഡൽഹി: പ്രധാനമന്ത്രി നരേന്ദ്ര മോദിയുടെ വിവിധ വിദേശ സന്ദർശനങ്ങൾക്കായി ഈ വർഷം ഇതുവരെ ഏകദേശം 75 കോടി രൂപ ചെലവായി. 2021 മുതൽ ഇതുവരെ 557 കോടി രൂപയും ചെലവഴിച്ചതായി കേന്ദ്ര സർക്കാർ രാജ്യസഭയെ അറിയിച്ചു. ആം ആദ്മി പാർട്ടി എംപി സഞ്ജയ് സിങ്, സിപിഐ എംപി വി. ശിവദാസൻ എന്നിവരുടെ ചോദ്യത്തിന് വിദേശകാര്യ മന്ത്രാലയം രേഖാമൂലം നൽകിയ മറുപടിയിലാണ് ഈ വിവരങ്ങൾ.
ഈ വർഷം ജൂലൈ വരെയുള്ള പ്രധാനമന്ത്രിയുടെ വിദേശ സന്ദർശനങ്ങൾക്കായി ആകെ 74,58,93,797 രൂപയാണ് (ഏകദേശം 74.59 കോടി രൂപ) ചെലവായത്. മലേഷ്യ, ഇസ്രയേൽ, യുഎഇ, നെതർലാൻഡ്സ്, സ്വീഡൻ, നോർവെ, ഇറ്റലി, ഫ്രാൻസ്, സ്ലൊവാക്യ, സീഷെൽസ്, ഇന്തോനേഷ്യ, ഓസ്ട്രേലിയ, ന്യൂസിലൻഡ് എന്നീ രാജ്യങ്ങളാണ് അദ്ദേഹം സന്ദർശിച്ചത്.
മന്ത്രാലയം നൽകിയ കണക്കുകൾ പ്രകാരം, മെയ് മാസത്തിന്റെ രണ്ടാം പകുതിയിൽ നോർവെ സന്ദർശിച്ചപ്പോഴാണ് ഏറ്റവും കൂടുതൽ തുക ചെലവഴിച്ചത് - 17,46,50,390 രൂപ. ഫെബ്രുവരിയിൽ നടത്തിയ ഇസ്രയേൽ സന്ദർശനത്തിനായി 11,92,25,938 രൂപയും ചെലവായി. ഈ വർഷം ഇതുവരെ 13 രാജ്യങ്ങളാണ് അദ്ദേഹം സന്ദർശിച്ചിട്ടുള്ളത്.
2021 മുതൽ പ്രധാനമന്ത്രി നടത്തിയ വിദേശയാത്രകളുടെ രാജ്യ തിരിച്ചുള്ള വിവരങ്ങളും, ആ വർഷം മുതലുള്ള ആകെ ചെലവും വർഷം തോറും സന്ദർശനം തോറുമുള്ള കണക്കുകളും എംപിമാർ ആവശ്യപ്പെട്ടിരുന്നു.
