ഭാര്യയോട് വഴക്കിട്ട് കാറുകളോട് അതിക്രമം :യുവാവ് അറസ്റ്റില്
ചെന്നൈ:തമിഴ്നാട്ടില് ഭാര്യയുമായുള്ള വഴക്കിനെ തുടര്ന്ന് യുവാവിന്റെ പരാക്രമം. സെക്കന്ഡ് ഹാന്ഡ് ഷോറൂമിലെ ഗ്യാരേജില് നിര്ത്തിയിട്ടിരുന്ന 20 കാറുകള് യുവാവ് അടിച്ചുതകര്ത്തു. സംഭവത്തില് 35കാരനായ ഭൂബാലനെ പോലീസ് അറസ്റ്റ് ചെയ്തു. ഭാര്യയുമായുള്ള കുടുംബപ്രശ്നമാണ് യുവാവിന്റെ പരാക്രമത്തിന് കാരണമെന്ന് പോലീസ് പറഞ്ഞു. കൊളത്തൂരിലാണ് സംഭവം.
ഷോറൂം ഉടമ നല്കിയ പരാതിയെ തുടര്ന്ന് നടത്തിയ അന്വേഷണത്തിലാണ് സംഭവം പുറത്തുവന്നത്. കഴിഞ്ഞ ദിവസംരാവിലെ ഷോറൂമില് എത്തിയപ്പോള് കാറുകള് ആരോ അടിച്ചുതകര്ത്ത നിലയിലാണെന്ന് കാണിച്ചാണ് ഷോറൂം ഉടമ പരാതി നല്കിയത്. തുടര്ന്ന് സിസിടിവി ദൃശ്യങ്ങളുടെ സഹായത്തോടെ നടത്തിയ അന്വേഷണം പ്രതിയായ യുവാവിവല് എത്തുകയായിരുന്നു. ലഹരി വിമുക്ത കേന്ദ്രത്തില് നിന്ന് രണ്ടു ദിവസം മുന്പ് പുറത്തിറങ്ങിയ ഭൂബാലന് നേരെ ഗ്യാരേജിലേക്കു പോയി വാഹനങ്ങള് അടിച്ചുതകര്ക്കുകയായിരുന്നുവെന്ന് പോലീസ് പറയുന്നു. ഭാര്യയെ സംശയിച്ചാണ് യുവാവിന്റെ പരാക്രമമെന്നും പോലീസ് പറഞ്ഞു.