പരിസ്ഥിതി-സമുദ്ര സംരക്ഷണ ബോധവൽക്കരണത്തിന് വേൾഡ് മലയാളി കൗൺസിൽ അമേരിക്ക റീജിയന്റെ ആഹ്വാനം; യുവതലമുറയ്ക്കായി പ്രത്യേക മത്സരവും സെമിനാറും

പിന്റോ കണ്ണമ്പിള്ളി 

വാഷിംഗ്ടൺ ഡി സി : പരിസ്ഥിതി-സമുദ്ര സംരക്ഷണ ബോധവൽക്കരണത്തിന് വേൾഡ് മലയാളി കൗൺസിൽ അമേരിക്ക റീജിയന്റെ ആഹ്വനം; യുവതലമുറയ്ക്കായി പ്രത്യേക മത്സരവും സെമിനാറും

അമേരിക്കയിലെ മലയാളി സമൂഹത്തിൽ പരിസ്ഥിതി സംരക്ഷണത്തിന്റെയും സമുദ്ര സംരക്ഷണത്തിന്റെയും പ്രാധാന്യം കൂടുതൽ ശക്തമായി പ്രചരിപ്പിക്കുന്നതിനായി വേൾഡ് മലയാളി കൗൺസിൽ (WMC) അമേരിക്ക റീജിയൻ വിപുലമായ ബോധവൽക്കരണ പരിപാടികൾക്ക് തുടക്കമിട്ടു. ജൂൺ 5-ലെ ലോക പരിസ്ഥിതി ദിനവും ജൂൺ 8-ലെ ലോക സമുദ്ര ദിനവും ആചരിക്കുന്നതിന്റെ ഭാഗമായി യുവജനങ്ങളെയും കുടുംബങ്ങളെയും പങ്കെടുപ്പിച്ചുകൊണ്ട് പ്രത്യേക മത്സരവും സെമിനാറും സംഘടിപ്പിക്കുമെന്ന് ഭാരവാഹികൾ അറിയിച്ചു.

പരിസ്ഥിതി സംരക്ഷണത്തിനായുള്ള ആഗോള പ്രവർത്തനങ്ങൾക്ക് നേതൃത്വം നൽകുന്ന പ്രധാന ഐക്യരാഷ്ട്രസഭാ ദിനമാണ് ലോക പരിസ്ഥിതി ദിനം. മനുഷ്യജീവിതത്തിന്റെയും ഭൂമിയുടെ നിലനിൽപ്പിന്റെയും അടിത്തറയായ സമുദ്രങ്ങളുടെ സംരക്ഷണത്തിന്റെ ആവശ്യകത ലോകസമുദ്ര ദിനം ഓർമ്മിപ്പിക്കുന്നു. ഈ രണ്ട് ദിനങ്ങളുടെയും സന്ദേശം സമൂഹത്തിലേക്ക് എത്തിക്കുന്നതിനും ഭാവിതലമുറയിൽ പരിസ്ഥിതി ബോധം വളർത്തുന്നതിനുമാണ് WMC അമേരിക്ക റീജിയന്റെ ഈ സംരംഭം.

മത്സരത്തിന്റെ ഭാഗമായി പങ്കാളികൾക്ക് പരമാവധി രണ്ട് ഫോട്ടോകളും “പരിസ്ഥിതിയെയും സമുദ്രങ്ങളെയും സംരക്ഷിക്കാൻ പുതിയ തലമുറയോട് പറയാനുള്ള സന്ദേശം” അല്ലെങ്കിൽ “സ്വന്തം ദർശനം” ഉൾക്കൊള്ളുന്ന ഒരു കുറിപ്പും സമർപ്പിക്കാം. സന്ദേശം പരമാവധി ഏഴ് വാക്യങ്ങളിലും 200 വാക്കുകൾക്കുള്ളിലും ആയിരിക്കണം. 200 വാക്കുകൾ കവിയുന്ന എൻട്രികൾ പരിഗണിക്കപ്പെടില്ല. മൂല്യനിർണയത്തിൽ ഫോട്ടോകൾക്ക് 40 ശതമാനവും സന്ദേശത്തിന് 60 ശതമാനവും മാർക്ക് നൽകും.

ജൂൺ 15 ആണ് എൻട്രികൾ സമർപ്പിക്കാനുള്ള അവസാന തീയതി. മത്സരത്തിലെ മികച്ച ഒന്നാം സ്ഥാന ജേതാവിന് അടുത്ത ബിയന്നിയൽ കോൺഫറൻസിൽ സർട്ടിഫിക്കറ്റും പ്രത്യേക അവാർഡും സമ്മാനിക്കും. എൻട്രികൾ [email protected] എന്ന ഇമെയിൽ വിലാസത്തിലേക്ക് അയയ്ക്കാവുന്നതാണ്.

ഇതിനോടനുബന്ധിച്ച് പരിസ്ഥിതി സംരക്ഷണം, പ്ലാസ്റ്റിക് മലിനീകരണം, കാലാവസ്ഥ വ്യതിയാനം, സമുദ്ര സംരക്ഷണം തുടങ്ങിയ വിഷയങ്ങളിൽ വിദഗ്ധർ പങ്കെടുക്കുന്ന ബോധവൽക്കരണ സെമിനാർ ജൂൺ മൂന്നാം വാരത്തിൽ സംഘടിപ്പിക്കുമെന്നും ഭാരവാഹികൾ അറിയിച്ചു. സമൂഹത്തിൽ, പ്രത്യേകിച്ച് യുവജനങ്ങളിൽ, പ്രകൃതിയോടും പരിസ്ഥിതിയോടും ഉത്തരവാദിത്വബോധം വളർത്തുക എന്നതാണ് പരിപാടിയുടെ ലക്ഷ്യം.

അടുത്തിടെ തെരഞ്ഞെടുക്കപ്പെട്ട പുതിയ അമേരിക്ക റീജിയൻ നേതൃത്വത്തിന്റെ ആദ്യകാല പ്രധാന സാമൂഹിക-പരിസ്ഥിതി സംരംഭങ്ങളിലൊന്നായാണ് ഈ പരിപാടി വിലയിരുത്തപ്പെടുന്നത്. അമേരിക്ക റീജിയൻ ചെയർമാൻ ജോണി കുന്നംപുറം, പ്രസിഡന്റ് പിന്റോ കണ്ണമ്പള്ളി, ജനറൽ സെക്രട്ടറി അനീഷ് ജെയിംസ്, ട്രഷറർ നിവിൻ വിൽഫ്രഡ് എന്നിവർ സംയുക്ത പ്രസ്താവനയിൽ പരിസ്ഥിതിയുടെയും സമുദ്രങ്ങളുടെയും സംരക്ഷണം മനുഷ്യരാശിയുടെ നിലനിൽപ്പുമായി നേരിട്ട് ബന്ധപ്പെട്ട വിഷയമാണെന്നും അതിനായി സമൂഹത്തിന്റെ എല്ലാ വിഭാഗങ്ങളും ഒന്നിച്ച് പ്രവർത്തിക്കേണ്ടത് കാലഘട്ടത്തിന്റെ അനിവാര്യതയാണെന്നും അഭിപ്രായപ്പെട്ടു.

“ഇന്നത്തെ ചെറിയ പ്രവർത്തനങ്ങളാണ് നാളത്തെ സുരക്ഷിതമായ ഭൂമിയെയും സമുദ്രങ്ങളെയും സൃഷ്ടിക്കുന്നത്. പുതുതലമുറയ്ക്ക് ആരോഗ്യകരവും ഹരിതാഭവുമായ ഒരു ലോകം കൈമാറുക നമ്മുടെ കൂട്ടായ ഉത്തരവാദിത്തമാണ്,” നേതാക്കൾ പറഞ്ഞു.

സാമൂഹിക പ്രതിബദ്ധത, യുവജന പങ്കാളിത്തം, പരിസ്ഥിതി സംരക്ഷണം എന്നിവയ്ക്ക് മുൻഗണന നൽകിക്കൊണ്ട് അമേരിക്ക റീജിയൻ പുതിയ പ്രവർത്തന വർഷത്തിലേക്ക് കടക്കുകയാണെന്നും കൂടുതൽ സമൂഹമുന്നേറ്റ പദ്ധതികൾ വരും മാസങ്ങളിൽ പ്രഖ്യാപിക്കുമെന്നും നേതൃത്വം അറിയിച്ചു.