2035-ൽ ഇസ്ലാം ലോകത്തിലെ ഏറ്റവും വലിയ മതമാകുമെന്ന് പഠനങ്ങൾ ; ക്രിസ്ത്യൻ ജനസംഖ്യയിൽ കോംഗോ അമേരിക്കയെ മറികടക്കും

Nov 22, 2026 - 15:54
 0  4
2035-ൽ ഇസ്ലാം ലോകത്തിലെ ഏറ്റവും വലിയ മതമാകുമെന്ന് പഠനങ്ങൾ ; ക്രിസ്ത്യൻ ജനസംഖ്യയിൽ കോംഗോ അമേരിക്കയെ മറികടക്കും

പി പി ചെറിയാൻ



വാഷിംഗ്ടൺ: 2035-ഓടെ ക്രിസ്തുമതത്തെ മറികടന്ന് ഇസ്ലാം ലോകത്തിലെ ഏറ്റവും വലിയ മതവിഭാഗമായി മാറുമെന്ന് പ്യൂ റിസർച്ച് സെന്ററിന്റെ (Pew Research Center) പുതിയ പഠന റിപ്പോർട്ട്. 2070-ഓടെ ഏറ്റവും കൂടുതൽ ക്രിസ്ത്യാനികൾ ഉള്ള രാജ്യമെന്ന പദവി അമേരിക്കയിൽ നിന്ന് ഡെമോക്രാറ്റിക് റിപ്പബ്ലിക് ഓഫ് കോംഗോ (DRC) സ്വന്തമാക്കുമെന്നും റിപ്പോർട്ടിൽ പറയുന്നു.

2020-ൽ ലോകത്ത് 227 കോടി ക്രിസ്ത്യാനികളും 202 കോടി മുസ്ലീങ്ങളുമാണുണ്ടായിരുന്നത്. എന്നാൽ 2035-ഓടെ മുസ്ലീം ജനസംഖ്യ 257 കോടിയായും ക്രിസ്ത്യൻ ജനസംഖ്യ 252 കോടിയായും മാറും. 2070-ഓടെ ലോകജനസംഖ്യയുടെ 36 ശതമാനത്തോളം (360 കോടിയിലധികം) മുസ്ലീങ്ങളായിരിക്കും.

 മതപരിവർത്തനത്തേക്കാൾ ഉപരി ജനനനിരക്കിലെ വ്യത്യാസവും ജനസംഖ്യയിലെ യുവാക്കളുടെ പ്രാതിനിധ്യവുമാണ് ഈ മാറ്റത്തിന് പിന്നിൽ. മുസ്ലീങ്ങൾക്കിടയിലെ ഉയർന്ന ജനനനിരക്കും (3.1) കുറഞ്ഞ ശരാശരി പ്രായവും (24 വയസ്സ്) വളർച്ചയ്ക്ക് വേഗത കൂട്ടുന്നു.

2070-ഓടെ ലോകത്തിലെ പകുതിയിലധികം ക്രിസ്ത്യാനികളും സബ്-സഹാറൻ ആഫ്രിക്കയിലായിരിക്കും. കോംഗോയിലെ ക്രിസ്ത്യൻ ജനസംഖ്യ 9.2 കോടിയിൽ നിന്ന് 29.9 കോടിയായി കുതിച്ചുയരും.

 നിലവിൽ 21.7 കോടി ക്രിസ്ത്യാനികളുള്ള അമേരിക്കയിൽ 2070-ഓടെ ഇത് 17.4 കോടിയായി കുറയുകയും രാജ്യത്തിന് ക്രിസ്ത്യൻ ഭൂരിപക്ഷം നഷ്ടപ്പെടുകയും ചെയ്യും. പാശ്ചാത്യ രാജ്യങ്ങളിൽ മതവിശ്വാസം ഉപേക്ഷിക്കുന്നവരുടെ എണ്ണം കൂടുന്നതും ജനനനിരക്ക് കുറയുന്നതുമാണ് ഇതിന് കാരണം.

അതേസമയം, കോംഗോയിൽ ക്രിസ്ത്യൻ ജനസംഖ്യ വർദ്ധിക്കുമ്പോഴും അവിടെ ഐസിസ് (ISIS) ബന്ധമുള്ള തീവ്രവാദ സംഘടനകളിൽ നിന്ന് ക്രിസ്ത്യാനികൾ കടുത്ത ആക്രമണങ്ങളും പീഡനങ്ങളും നേരിടുന്നുണ്ടെന്നും റിപ്പോർട്ട് ചൂണ്ടിക്കാട്ടുന്നു.