ഇന്ത്യൻ വിദ്യാർത്ഥികളെ കാത്ത് ന്യൂസീലൻഡ്: കുടുംബത്തെയും ഒപ്പം കൂട്ടാം, പി.ആറും ഉറപ്പ്
വിദേശത്ത് ഉപരിപഠനവും മികച്ച കരിയറും ലക്ഷ്യമിടുന്ന മലയാളി വിദ്യാർത്ഥികൾക്ക് സുവർണ്ണാവസരവുമായി ന്യൂസീലൻഡ്. കേവലം ഒരു ട്രെൻഡ് എന്നതിലുപരി, പഠനത്തിന് ശേഷം മികച്ച ജോലി കണ്ടെത്താനും പങ്കാളിയെക്കൂടി ഒപ്പം കൂട്ടി ജീവിതം സുരക്ഷിതമാക്കാനുമുള്ള ദീർഘവീക്ഷണത്തോടെയാണ് ജെൻസികൾ ഇപ്പോൾ വിദേശപഠനത്തെ സമീപിക്കുന്നത്.
കുടിയേറ്റ നിയമങ്ങളിൽ പല രാജ്യങ്ങളും കടിഞ്ഞാൺ ഇടുന്നതിനിടയിലാണ് ഇന്ത്യൻ വിദ്യാർത്ഥികൾക്ക് അനുകൂലമായ പുതിയ നയങ്ങളുമായി ന്യൂസീലൻഡ് രംഗത്തെത്തിയിരിക്കുന്നത്.
കഴിഞ്ഞ ജൂണിൽ ഇമിഗ്രേഷൻ ന്യൂസീലൻഡ് അധികൃതർ പ്രഖ്യാപിച്ച പുതിയ നയങ്ങൾ അന്താരാഷ്ട്ര ബിരുദധാരികൾക്ക് വലിയ ആശ്വാസമാണ് നൽകുന്നത്. പുതിയ ഹ്രസ്വകാല ഗ്രാജ്വേറ്റ് വീസ അവതരിപ്പിച്ചതും പോസ്റ്റ്-സ്റ്റഡി വർക്ക് വിസയുടെ യോഗ്യതാ മാനദണ്ഡങ്ങൾ വിപുലീകരിച്ചതുമെല്ലാം വിദ്യാർത്ഥികൾക്ക് രാജ്യത്ത് തുടരാനും അനുയോജ്യമായ ജോലി കണ്ടെത്താനും വഴിയൊരുക്കുന്നു.
മികച്ച കാലാവസ്ഥ, ആഗോളനിലവാരമുള്ള സർവകലാശാലകൾ, ഗവേഷണ അവസരങ്ങൾ, കുറഞ്ഞ കുറ്റകൃത്യ നിരക്ക്, ഉയർന്ന ജീവിതനിലവാരം, കുറഞ്ഞ പഠനച്ചെലവ് എന്നിവയാണ് ന്യൂസീലൻഡിനെ വിദ്യാർത്ഥികളുടെ പ്രിയപ്പെട്ട ഇടമാക്കുന്നത്. പ്ലസ് ടൂവിന് കുറഞ്ഞത് 50 ശതമാനം മാർക്കുള്ള വിദ്യാർത്ഥികൾക്ക് ഇവിടെ ഉപരിപഠനത്തിന് അവസരമുണ്ട്.
പഠനകാലത്ത് കുടുംബത്തെ ഒപ്പം കൂട്ടാമെന്നതും പങ്കാളിക്ക് ഫുൾടൈം ജോലി ചെയ്യുന്നതിനോടൊപ്പം പി.ആറിന് അപേക്ഷിക്കാമെന്നതും വലിയ പ്രത്യേകതയാണ്. എൻജിനീയറിങ്, ആരോഗ്യമേഖല, സോഷ്യൽ സർവീസ്, ഐ.ടി, അധ്യാപനം, സയൻസ്, അഗ്രികൾചർ, ബിസിനസ്, ഹോസ്പിറ്റാലിറ്റി തുടങ്ങിയ തൊഴിലവസരങ്ങൾ ഏറെയുള്ള മേഖലകൾ ഉൾപ്പെടുത്തിയുള്ള ‘ഗ്രീൻ ലിസ്റ്റ്’ പ്രകാരം പഠനം പൂർത്തിയാക്കി ജോലിയിൽ പ്രവേശിക്കുമ്പോൾ തന്നെ പി.ആറിനായി അപേക്ഷിക്കാനാകും. ഇത് വിദ്യാർത്ഥികളുടെ സ്ഥിരതാമസ സാധ്യത ഇരട്ടിയാക്കുന്നു.
ഇതിനുപുറമെ, തിരഞ്ഞെടുക്കുന്ന കോഴ്സുകൾക്ക് 50 മുതൽ 100 ശതമാനം വരെ, അതായത് 12 ലക്ഷം രൂപ വരെ സ്കോളർഷിപ്പ് നേടാനും അവസരമുണ്ട്. IELTS, PTE തുടങ്ങിയ ഇംഗ്ലീഷ് ഭാഷാ പ്രാവീണ്യ പരിശോധനകൾ ഇല്ലാതെ തന്നെ ചില യൂണിവേഴ്സിറ്റികളിൽ പ്രവേശനം നേടാം എന്നത് വിദ്യാർത്ഥികൾക്ക് വലിയ ആശ്വാസമാണ്. പഠനത്തോടൊപ്പം ആഴ്ചയിൽ 25 മണിക്കൂർ വരെ പാർട്ട് ടൈം ജോലി ചെയ്യാനും, ബാച്ചിലേഴ്സ്, മാസ്റ്റേഴ്സ്, പിഎച്ച്ഡി കോഴ്സുകൾക്ക് മൂന്ന് വർഷം വരെ സ്റ്റേബാക്ക് നേടാനും സാധിക്കും.
