സ്റ്റാർഷിപ് എട്ടാം പരീക്ഷണ പറക്കലിനിടെ വീണ്ടും പൊട്ടിത്തെറിച്ചു
കാലിഫോര്‍ണിയ: സ്റ്റാര്‍ഷിപ്പിന്‍റെ എട്ടാം പരീക്ഷണ പറക്കലിനിടെ വീണ്ടും പൊട്ടിത്തെറി. സ്പേസ് എക്സിന്‍റെ ഗ്രഹാന്തര റോക്കറ്റായ സ്റ്റാര്‍ഷിപ്പാണ് എട്ടാം പരീക്ഷണ വിക്ഷേപണം നടന്ന ഇന്ന് പൊട്ടിത്തെറിച്ചത്. ഏഴാം പരീക്ഷണ വിക്ഷേപണത്തിലെ തനിയാവര്‍ത്തനം പോലെ തന്നെയായിരുന്നു ഇത്തവണയും. ഭീമാകാരന്‍ ബൂസ്റ്റര്‍ വേർപിരിഞ്ഞപ്പോൾ മുകളിലെ ഷിപ്പ് ഭാഗം നിയന്ത്രണം നഷ്ടമായി അഗ്നിഗോളമാവുകയായിരുന്നു. സ്റ്റാര്‍ഷിപ്പിന്‍റെ പൊട്ടിത്തെറിയുടെ നിരവധി വീഡിയോകളും ഫോട്ടോകളും പുറത്തുവന്നിരുന്നു. ഇതിൽ ഏറ്റവും ശ്രദ്ധേയമായത് അന്താരാഷ്ട്ര ബഹിരാകാശ നിലയത്തില്‍ നിന്ന് ഡോണ്‍ പെറ്റിറ്റ് പകര്‍ത്തിയ ചിത്രങ്ങളാണ്.
അന്താരാഷ്ട്ര ബഹിരാകാശ നിലയത്തിലെ നാസയുടെ സഞ്ചാരിയായ ഡോണ്‍ പെറ്റിറ്റ് സ്റ്റാര്‍ഷിപ്പിന്‍റെ എട്ടാം പരീക്ഷണ പറക്കലിന് മധ്യേ സംഭവിച്ച പൊട്ടിത്തെറി ക്യാമറയിലാക്കുകയായിരുന്നു. ഐഎസ്എസില്‍ നിന്ന് മുമ്പും അനേകം വിസ്മയ ചിത്രങ്ങള്‍ പകര്‍ത്തിയിട്ടുള്ള പെറ്റിറ്റിന്‍റെ ഈ ശ്രമവും വലിയ ശ്രദ്ധ നേടി. സ്റ്റാര്‍ഷിപ്പ് ബഹിരാകാശ വിക്ഷേപണ വാഹനം അന്തരീക്ഷത്തില്‍ വച്ച് പൊട്ടിത്തെറിക്കുന്ന നിമിഷം പെറ്റിറ്റ് മനോഹരമായി ക്യാമറയിലാക്കി.
തുടര്‍ച്ചയായ രണ്ടാം വിക്ഷേപണ ശ്രമത്തിലും സ്റ്റാര്‍ഷിപ്പ് മെഗാ റോക്കറ്റിന്‍റെ രണ്ടാം ഭാഗം സ്പേസ് എക്സിന് വിജയിപ്പിക്കാനായില്ല. ബൂസ്റ്ററില്‍ നിന്ന് വേര്‍പിരിഞ്ഞ ശേഷം ഷിപ്പ് ഭാഗം പൊട്ടിത്തെറിക്കുകയായിരുന്നു. സ്റ്റാര്‍ഷിപ്പിന്‍റെ കഴിഞ്ഞ പരീക്ഷണത്തിലും ഇതേ തിരിച്ചടി ഇലോണ്‍ മസ്കിന്‍റെ ഉടമസ്ഥതയിലുള്ള സ്പേസ് എക്സിന് സംഭവിച്ചിരുന്നു
