നടൻ പവൻ കല്യാണിന്റെ മകന് സിംഗപ്പൂരിൽ സ്കൂളിലുണ്ടായ തീപിടുത്തത്തിൽ പരിക്ക്
ആന്ധ്രാപ്രദേശ് ഉപമുഖ്യമന്ത്രിയും നടനുമായ പവൻ കല്യാണിന്റെ ഇളയ മകൻ മാർക്ക് ശങ്കർ പവനോവിച്ചിന് സിംഗപ്പൂരിലെ സ്കൂളിലുണ്ടായ തീപിടുത്തത്തിൽ പരിക്കേറ്റു. ചൊവ്വാഴ്ച രാവിലെ 9.45 ഓടെയാണ് റിവർ വാലി ഷോപ്പ്ഹൗസിലുള്ള ഒരു സ്‌കൂളിലാണ് സംഭവം. തീപിടുത്തത്തിൽ മാർക്കിന്റെ കൈകൾക്കും കാലുകൾക്കും പരിക്കേറ്റു, മറ്റ് നിരവധി കുട്ടികൾക്കും പരിക്ക് പറ്റിയതായി റിപോർട്ടുണ്ട്. ഇവരെ ചികിത്സയ്ക്കായി അടുത്തുള്ള ആശുപത്രികളിലേക്ക് കൊണ്ടുപോയി.
കുട്ടികളുടെ ക്യാമ്പ് നടന്നിരുന്ന കെട്ടിടത്തിന്റെ രണ്ടാമത്തെയും മൂന്നാമത്തെയും നിലകളിലാണ് തീപിടുത്തമുണ്ടായത്. വിവരം ലഭിച്ചയുടനെ സിംഗപ്പൂർ സിവിൽ ഡിഫൻസ് ഫോഴ്‌സ് സ്ഥലത്തെത്തി രക്ഷാപ്രവർത്തനം ആരംഭിച്ചു, അകത്ത് കുടുങ്ങിയവരെ പുറത്തെത്തിച്ചു.
സംഭവത്തിൽ 15 കുട്ടികൾ ഉൾപ്പെടെ 19 പേർക്ക് പരിക്കേറ്റു. പുക ശ്വസിച്ചതിനെ തുടർന്ന് മാർക്ക് ശങ്കറിനും ശ്വസിക്കാൻ ബുദ്ധിമുട്ട് അനുഭവപ്പെട്ടു. സംഭവമറിഞ്ഞ പവൻ കല്യാൺ സിംഗപ്പൂരിലേക്ക് പോകാൻ ഒരുങ്ങുന്നു.
