'ഗെയിം ഓഫ് ത്രോണ്‍സിലെ' ഡെയര്‍ ചെന്നായ്ക്കള്‍ക്ക് ജനിതക എൻജിനീയറിങ്ങിലൂടെ പുനര്‍ജന്മം
12,500 വർഷം മുമ്ബ് വംശനാശം സംഭവിച്ച ഡയർ ചെന്നായ്ക്കളെ ജീൻ എഡിറ്റിങ്ങിലൂടെ വീണ്ടും സൃഷ്ടിച്ചതായി കൊളോസല്‍ ബയോസയന്‍സസ് അവകാശപ്പെട്ടു. ഡെയർ ചെന്നായ്ക്കളെ എല്ലാവർക്കും അറിയാൻ വഴിയില്ല. 'ഗെയിം ഓഫ് ത്രോണ്‍സ്' വെബ് സീരീസിലെ കൂറ്റൻ വെള്ള ചെന്നായ്ക്കളെ ഓർമയില്ലേ. അവയാണ് ഡെയർ ചെന്നായ്ക്കള്‍.
റോമുലസ്, റീമസ് എന്നീ രണ്ട് ചെന്നായ്ക്കുഞ്ഞുങ്ങളെയാണ് ജനിതക എഞ്ചിനീയറിങ്ങിലൂടെ പുന:സൃഷ്ടിച്ചത്. 12,500 വർഷങ്ങള്‍ക്ക് മുമ്ബ് വടക്കേ അമേരിക്കൻ വൻകരയില്‍ ജീവിച്ചിരുന്നവയാണ് ഡെയർ ചെന്നായകള്‍. സാധാരണ ചെന്നായ്കളേക്കാള്‍ വളരെയേറെ വലിപ്പമുള്ളവയാണ് ഇവ. കാലാവസ്ഥാ വ്യതിയാനവും ഇരകളുടെ ദൗർലഭ്യവും കാരണം ഇവയ്ക്ക് വംശനാശം സംഭവിച്ചുവെന്നാണ് കരുതുന്നത്. പലപ്പോഴായി ഇവയുടെ ഫോസിലുകള്‍ കണ്ടെത്തിയിരുന്നു.
12,500 വർഷവും 70,000 വർഷവും പഴക്കമുള്ള ഫോസിലില്‍ നിന്ന് ഡെയർ ചെന്നായ്ക്കളുടെ ഡി.എൻ.എ വേർതിരിച്ചെടുത്താണ് ഇവയുടെ ജനിതക ഘടന പഠിച്ചത്. ഡയര്‍ ചെന്നായ്ക്കളുടെ ജീവിച്ചിരിക്കുന്ന ഏറ്റവും അടുത്ത ബന്ധുവാണ് ഇപ്പോഴുള്ള ഗ്രേ ചെന്നായ്ക്കള്‍. ഗ്രേ ചെന്നായ്ക്കളുടെ ഭ്രൂണത്തിന്‍റെ ജനിതകഘടനയില്‍ CRISPR ജീൻ എഡിറ്റിങ് സാങ്കേതിക വിദ്യ ഉപയോഗിച്ച്‌ കൊളോസല്‍ ബയോസയന്‍സസിലെ ശാസ്ത്രജ്ഞർ 14 എഡിറ്റിങ്ങുകള്‍ നടത്തി ഡയർ ചെന്നായ്ക്കളുടെ ജനിതകഘടന സൃഷ്ടിക്കുകയായിരുന്നു. തുടർന്നാണ് ഡയർ ചെന്നായ്ക്കളുടെ എല്ലാ ജനിതക സ്വഭാവങ്ങളോടും കൂടിയ ചെന്നായ്ക്കള്‍ ജന്മമെടുത്തത്.
