പ്രണയം: ഗദ്യ കവിത, പുഷ്പ ബേബി തോമസ്
പുഷ്പ ബേബി തോമസ്
ചില കാര്യങ്ങൾ പറഞ്ഞു മനസ്സിലാക്കുക
എളുപ്പമല്ല. അനുഭവിച്ചറിയണം;
പ്രണയം അങ്ങനെയാണ് .
കാത്തിരിക്കുന്ന , നനഞ്ഞു
കൊണ്ടിരിക്കുന്ന, കനലൊളിപ്പിച്ച ചാരം
മൂടിയ അവസ്ഥയിലായാലും അത്
അനുഭവിക്കണം.
അതേ ... പ്രണയം ജീവിതത്തിലെ
അത്യപൂർവ്വ അനുഭവമാണ്;
അനുഭവിക്കുന്നവർ അത്യന്തം
ഭാഗ്യശാലികളും .
തീവ്രമായി ആഗ്രഹിക്കുന്നതൊന്നും
ലഭിക്കാതെ പോവില്ല എന്നതാണ്
പ്രകൃതി നിയമം. ജീവിതത്തിൽ
ഒരിയ്ക്കൽ ... ഒരാളോട്......ഒരാളോട്
മാത്രം; തോന്നുന്ന അനുഭൂതിയാണ്
പ്രണയം . അടുത്തുണ്ടാവണമെന്നോ,
കാണണമെന്നോ , കേൾക്കണമെന്നോ ഇല്ല.
ശ്വസിക്കുന്ന വായുവിൽ അവനാണ് .ഏറെ
കൊതിക്കുമ്പോൾ അവനും അതേ
കൊതിയോടെ നിന്നെ കുറിച്ച് അതേ
കൊതിയോടെ ആലോചിക്കുകയാവും.
പ്രണയം അറിയാതെ സംഭവിച്ചു
പോകുന്നതാണ് . രണ്ടു മനസ്സുകൾ ഒരേ
സമയം ഒന്നിനായി ആഗ്രഹിക്കുക ...
ചിന്തിക്കുക ... കൊതിക്കുക ....
പ്രണയം ....
എനിക്കൊരു തിരിച്ചറിവാണ് ....
സ്വപ്നച്ചിറകുകളുടെ കരുത്തും ,
നിറങ്ങളുമാണ് ....
ഞാനറിയാതെ മനവും, മേനിയും
സുന്ദരമാവുന്നതാണ് ...
എന്നെ കവർന്നെടുക്കലാണ് ...
ഒരേ സമയം നിലയ്ക്കാത്ത ഇടവപ്പാതിയും ,
മീനച്ചൂടും, വൃശ്ചിക നിലാവും, മേടപ്പൂരവും ,
തുലാവർഷവും, ധനുമാസക്കാറ്റും
ഒക്കെയാണ് .
അതേ .... പ്രണയം ഒരേ സമയം
തേൻകട്ടയും , കർണ്ണംപൊട്ടി മുളകുമാ ണ്.
ശ്വാസവായുവായി ജീവനേകുകയും ,
നിശ്വാസവായുവായി കദനങ്ങളെ
പുറന്തള്ളാനും പ്രണയത്തിനാവും .
പ്രണയം എനിക്ക് തരുന്ന ഒരു
വിശ്വാസമുണ്ട് ; ആത്മവിശ്വാസമുണ്ട് .
ലോകത്തിലെ ഏറ്റവും ഭാഗ്യവതി
ഞാനനെന്ന തിരിച്ചറിവിൽ ,
ജീവിക്കാൻ പ്രേരിപ്പിച്ച് ...
'ഞാനാ " യി മാറ്റിക്കൊണ്ട് ,
മിഴികളിൽ അവന് മാത്രം വായിക്കാനാവുന്ന
കഥകൾ എഴുതി ഒളിപ്പിച്ച് ,
ചുറ്റുമുള്ളവരിലേക്ക് ഊർജ്ജം പ്രസരിപ്പിച്ച്
ജീവിയ്ക്കാൻ പ്രണയിനിയേക്ക കഴിയൂ ....
പ്രണയം അതി മനോഹരമാണ് ചെമ്പനീർ
പൂവു പോലെ ...
ശ്വസിക്കുന്ന വായുവിൽ അവനാണ് .....
ഓരോ അണുവിലും അവനാണ് ....
ചിന്തകളിൽ
ഓർമ്മകളിൽ
സ്വപ്നങ്ങളിൽ
എല്ലാം അവൻ മാത്രം .
ഒറ്റവാക്ക് തരുന്ന കവിതയുണ്ട് ....
അവൻ മൂളാത്ത എൻ്റെ വരികളുണ്ട് ...
അവന് മാത്രം തരാനാവുന്ന നിറവുണ്ട് ;
അവനായി മാത്രമുള്ള കാത്തിരിപ്പും .
ഫോട്ടോ; ലേഖ സൂസ്സൻ ജേക്കബ്
