നിത്യാനന്ദ ആരോഗ്യവാനായിരിക്കുന്നു; മരണവാര്‍ത്ത നിഷേധിച്ച് കൈലാസ
ചെന്നൈ: നിത്യാനന്ദയുടെ മരണവാര്‍ത്ത നിഷേധിച്ച് പ്രസ്താവന പുറത്തിറക്കി അദ്ദേഹവുമായി ബന്ധപ്പെട്ട വൃത്തങ്ങള്‍. നിത്യാനന്ദ പൂര്‍ണ ആരോഗ്യത്തോടെ സുരക്ഷിതനായി ഇരിക്കുന്നുവെന്നാണ് പ്രസ്താവനയില്‍ അറിയിച്ചിരിക്കുന്നത്. നിത്യാനന്ദ ജീവിച്ചിരിക്കുന്നുവെന്ന് തെളിയിക്കുന്നതിനായി മാര്‍ച്ച് 30-ന് അദ്ദേഹം പങ്കെടുത്ത ഒരു പരിപാടിയുടെ ലൈവ് സ്ട്രീമിങ് ലിങ്കും കൈലാസ പ്രതിനിധികള്‍ പുറത്തുവിട്ടിട്ടുണ്ട്. നിത്യാനന്ദയെ അപകീര്‍ത്തിപ്പെടുത്തുന്നതിനായി നടത്തുന്ന വ്യാജപ്രചാരണങ്ങളെ കൈലാസ ശക്തമായ അപലപിക്കുന്നുവെന്നും പ്രസ്താവനയില്‍ പറയുന്നുണ്ട്.
നിത്യാനന്ദയുടെ സഹോദരിയുടെ മകനും അനുയായിയുമായ സുന്ദരേശ്വരന്റെ വെളിപ്പെടുത്തലിനെ തുടര്‍ന്നാണ് മരണവാര്‍ത്ത വ്യപകമായി പ്രചരിച്ചത്. സനാതനധര്‍മം സ്ഥാപിക്കുന്നതിനുവേണ്ടി പോരാടിയ സ്വാമി ജീവത്യാഗം ചെയ്തെന്നാണ് സുന്ദരേശ്വരന്‍ അറിയിച്ചത്. നിത്യാനന്ദയുടെ മറ്റ് അനുയായികളെയും വീഡിയോ കോണ്‍ഫറന്‍സിങ്ങിലൂടെ സുന്ദരേശ്വരന്‍ മരണവിവരം അറിയിച്ചിരുന്നു. 2010-ല്‍ സിനിമാ നടിക്കൊപ്പമുള്ള വീഡിയോ പുറത്ത് വന്നതുമുതല്‍ വിവാദങ്ങളില്‍ നിറഞ്ഞുനിന്ന നിത്യാനന്ദ 2019-ല്‍ ഇന്ത്യയിൽ നിന്നും പോയിരുന്നു. തങ്ങളുടെ മൂന്ന് മക്കളെ തട്ടിക്കൊണ്ടുപോയതായി തമിഴ് ദമ്പതിമാര്‍ നല്‍കിയ പരാതിയില്‍ ഗുജറാത്ത് പോലീസ് അറസ്റ്റിന് നടപടി ആരംഭിച്ചതിനെ തുടർന്നായിരുന്നു രാജ്യം വിട്ടത്.
ഇക്വഡോറിന് സമീപം ഒരു ദീപില്‍ അനുയായികള്‍ക്കൊപ്പം നിത്യാനന്ദ കഴിയുന്നുവെന്നായിരുന്നു വിവരം. പിന്നീട് പലതവണ ഓണ്‍ലൈന്‍ മുഖേന ആത്മീയപ്രഭാഷണങ്ങളും നടത്തിയിരുന്നു. കൂടാതെ കൈലാസ എന്ന പേരില്‍ രാജ്യം സ്ഥാപിച്ചെന്നും അവകാശപ്പെട്ടു
