പട്ടണത്തിലെ വീട് ; കവിത, റോയ് പഞ്ഞിക്കാരൻ
പട്ടണത്തിലെ വീട്ടിൽ
കടലിരമ്പും കോലാഹലം.
അച്ഛൻ പിറന്ന വീടല്ല
അമ്മ പിറന്ന വീടല്ല
ഞാനും പിറന്ന വീടല്ല
എന്നിട്ടും
കടലിരമ്പും കോലാഹലം .
മക്കൾ പിറന്ന വീടാണത്
പുതു തലമുറ പിറന്ന വീട്
ഞാൻ പുറപ്പെട്ട ഗ്രാമത്തിലെ കാൽപ്പാടുകൾ
പട്ടണത്തിലെത്തിയപ്പോൾ കരിഞ്ഞുപോയി.
എങ്കിലുമെൻ തുരുമ്പെടുത്ത തമ്പുരുവിൽ
മോഹന രാഗം
തുടിക്കും .
റോയ് പഞ്ഞിക്കാരൻ