ഹേമ കമ്മിറ്റി റിപോര്‍ട്ട്: മൊഴി നല്‍കിയവരില്‍ നിന്ന് വിവരങ്ങള്‍ ശേഖരിച്ച്‌ പ്രത്യേക അന്വേഷണ സംഘം

ഡി ഐ ജി അജിതാ ബീഗത്തിന്റെ നേതൃത്വത്തില്‍ വനിതാ ഐ പി എസ് ഉദ്യോഗസ്ഥരാണ് അന്വേഷണം നട
ത്തുന്നത്. വിവിധ ഘട്ടങ്ങളിലായി അതിക്രമം നേരിട്ടവർ നിയമ നടപടികളുമായി മുന്നോട്ട് പോകാൻ തയ്യാറാകുമോ എന്നാണ് അന്വേഷണ സംഘം പരിശോധിക്കുക. ഇതുപ്രകാരം മൊഴി നല്‍കിയവർ പരാതിയില്‍ ഉറച്ചുനിന്നാല്‍ എഫ്‌ ഐ ആർ രജിസ്റ്റർ ചെയ്യാനാണ് തീരുമാനം. ഹൈക്കോടതിയുടെ ഇടപെടലിന് പിന്നാലെ പ്രത്യേക അന്വേഷണ സംഘത്തിന് റിപോർട്ടിന്റെ പൂർണ രൂപം കഴിഞ്ഞ ദിവസം സാംസ്‌കാരിക വകുപ്പ് അധികൃതർ കൈമാറിയിരുന്നു.

5,000ത്തോളം പേജുണ്ട്. 300റോളം പേജുകള്‍ സംഗ്രഹമാണ്. മൊഴികളും ഡിജിറ്റല്‍ തെളിവുകളും ഉള്‍പ്പെടെ മുഴുവനും സാംസ്‌കാരിക വകുപ്പ് കൈമാറിയിരുന്നു. കഴിഞ്ഞ വ്യാഴാഴ്ചയാണ് പോലീസ് ആസ്ഥാനത്തെത്തി സാംസ്‌കാരിക വകുപ്പ് ഡെപ്യൂട്ടി സെക്രട്ടറി സുഭാഷിണി തങ്കച്ചിയും ജോ. സെക്രട്ടറി സന്തോഷും ചേർന്ന് റിപോർട്ട് കൈമാറിയത്.
എ ഡി ജി പി ക്രൈം ബ്രാഞ്ച് മേധാവി എച്ച്‌ വെങ്കിടേശ്വൻ റിപോർട്ടിന്റെ പകർപ്പ് കൈപറ്റിയതിന് പിന്നാലെ എസ് ഐ ടിയുടെ അടിയന്തര യോഗം ചേരുകയും ഏത് തരത്തിലാണ് അന്വേഷണം മുന്നോട്ട് പോകേണ്ടതെന്ന് തീരുമാനിക്കുകയും ചെയ്തിരുന്നു.